ក្រុមហ៊ុនតូយ៉ូតា (Toyota) អាចជាក្រុមហ៊ុនផលិតរថយន្តដែលវិវត្តយឺតបំផុត ក្នុងការផលិតរថយន្តអគ្គិសនី ប៉ុន្តែវាអាចជាក្រុមហ៊ុនដំបូង  ដែលផលិតរថយន្តដែលដំណើរការដោយប្រេងសាំង។

នាយកប្រតិបត្តិក្រុមហ៊ុន Toyota ២រូប បានប្រាប់រ៉យទ័រថា អស់រយៈជិត៣ទស្សវត្សរ៍បន្ទាប់ពីការចេញរថយន្តព្រូស Prius ដែលជារថយន្តកូនកាត់សាំង-អគ្គិសនី ដែលត្រួសត្រាយផ្លូវរបស់ខ្លួន, ក្រុមហ៊ុន Toyota កំពុងផ្លាស់ប្តូរច្រើនបំផុត ហើយនៅទីបំផុតប្រហែលជាប្តូរទាំងអស់ នៃត្រកូល Toyota និង Lexus របស់ខ្លួន ទៅជារថយន្តកូនកាត់តែប៉ុណ្ណោះ ។

រថយន្ត​កូរ៉ូឡា​ហៃប្រីដ របស់តូយ៉ូតា

ការផ្តោតអារម្មណ៍ដ៏រឹងរូសរបស់ក្រុមហ៊ុនតូយ៉ូតា លើរថយន្តកូនកាត់ជាជាងរថយន្តធគ្គិសនី គឺជាផ្នែកមួយនៃការប្រកួតប្រជែងកាន់តែទូលំទូលាយ ដោយក្រុមហ៊ុនផលិតរថយន្តដ៏ធំបំផុតរបស់ពិភពលោកមួយនេះ ចំពោះឧស្សាហកម្មដែលកំពុងមាន និងជំនឿថារថយន្តទាំងអស់នឹងក្លាយជាអគ្គិសនីនាពេលខាងមុខ។

ប្រធានក្រុមហ៊ុនតូយ៉ូតា លោក អាគីអូ តូយ៉ូដា (Akio Toyoda) បាននិយាយកាលពីខែមករាថា លោកជឿជាក់ថា ចំណែកពិភពលោកនៃរថយន្តអគ្គិសនី នឹងកើនឡើងត្រឹមតែ ៣០% ប៉ុណ្ណោះ។ ក្រុមហ៊ុនផលិតរថយន្តជប៉ុននេះ ជំនួសមកវិញនូវយុទ្ធសាស្ត្រ “ច្រើនផ្លូវ” ដែលរួមបញ្ចូលទាំងរថយន្តអគ្គិសនី រួមជាមួយនឹងរថយន្តកូនកាត់, យានជំនិះឥន្ធនៈអ៊ីដ្រូសែន, ឥន្ធនៈបៃតង និងបច្ចេកវិទ្យាផ្សេងទៀត ដែលមិនទាន់លេចចេញមកជាសក្តានុពលនៅឡើយ។

ប្រមុខផ្នែកលក់ និងទីផ្សាររបស់ក្រុមហ៊ុន Toyota នៅអាមេរិកខាងជើង លោក David Christ បានប្រាប់រ៉យទ័រថា៖ “ឆ្ពោះទៅមុខ ពួកយើងគ្រោងនឹងវាយតម្លៃ មួយរោងចក្រម្តងៗ ថាតើការដំណើរការកូនកាត់ទាំងអស់ តើកើតឬអត់”។ ការវាយតម្លៃទាំងនោះ នឹងត្រូវធ្វើជាមួយគ្ប់ការរចនាម៉ូដឡើងវិញ ហើយវាមិនឆាប់ពេកទេ។

ដំណើរការនោះ រួមបញ្ចូលទាំងការរុះរើរដែលមិនទាន់សម្រេចនៃម៉ាក RAV4 សម្រាប់ឆ្នាំម៉ូដែល ២០២៦ ។ ម៉ូដែល RAV4 ដែលជាប្រភេទ SUV លក់ដាច់បំផុតរបស់អាមេរិក, មានប្រភេទ Hybrid ជាច្រើនម៉ូត មានចំនួនស្មើនឹងប្រមាណពាក់កណ្តាលនៃការលក់។

មនុស្ស២នាក់ដែលស្និទ្ធនេងការពិភាក្សាអំពីផែនការផលិតផលរបស់ក្រុមហ៊ុន Toyota បាននិយាយថា ក្រុមហ៊ុនផលិតរថយន្តនេះ ទំនងជានឹងបោះបង់ចោលស៊េរីសម្រាប់តែសាំង១មុខ សម្រាប់ទីផ្សារអាមេរិកខាងជើង ប៉ុន្តែមិនបានធ្វើការសម្រេចជាចុងក្រោយនៅឡើយទេ។

ក្រុមហ៊ុនផលិតរថយន្តនេះ បានបញ្ឈប់ការចេញរថយន្ត Camry ឆ្នាំ ២០២៥ ប្រើតែសាំងរបស់ខ្លួន ដែលលក់ដាច់បំផុតនៅអាមេរិករួចហើយ ខណៈរថយន្ត Land Cruiser និង Sienna minivan ដ៏រឹងមាំរបស់ខ្លួន ឥឡូវនេះមានតែប្រភេទកូនកាត់ប៉ុណ្ណោះ។

យោងតាមមនុស្ស២នាក់ដែលមិនបញ្ចេញឈ្មោះ ឲ្យដឹងថា ម៉ូដែលតែកូនកាត់ ក៏ទំនងជានឹងប្តូរមកជាពាក់កណ្តាលហៃប្រីដ និង​សាកភ្លើង (Plug-in hybrid) ដែលមានអាគុយធំជាង។

កិច្ចប្រឹងប្រែងរបស់ក្រុមហ៊ុនតូយ៉ូតា ក្នុងការបំប្លែងទាំងអស់ ឬស្ទើរតែទាំងអស់ នៃស៊េរីរថយន្តកូនកាត់តែ១ នៅអាមេរិកខាងជើងរបស់ខ្លួន មិនត្រូវបានរាយការណ៍ពីមុនមកទេ៕

វិនិយោគិនបរទេស បានដកប្រាក់យ៉ាងច្រើនចេញពីប្រទេសចិនកាលពីត្រីមាសមុន ដែលទំនងជាកំពុងឆ្លុះបញ្ចាំងពីភាពទុទិដ្ឋិនិយមដ៏ជ្រៅ អំពីប្រទេសសេដ្ឋកិច្ចធំទីពីររបស់ពិភពលោកនេះ។

យោងតាមទិន្នន័យពីរដ្ឋបាលរដ្ឋស្តីពីការប្តូរប្រាក់បរទេសដែលបានចេញផ្សាយពីថ្ងៃសុក្រទី៩ សីហា ឲ្យដឹងថា បំណុលវិនិយោគផ្ទាល់របស់ប្រទេសចិននៅក្នុងសមតុល្យនៃការទូទាត់របស់ខ្លួន បានធ្លាក់ចុះជិត ១៥ពាន់លានដុល្លារ ក្នុងអំឡុងខែមេសាដល់ខែមិថុនា ដោយគូសបញ្ជាក់ជាលើកទីពីរដែលតួលេខនេះបានប្រែជាអវិជ្ជមាន។ ក្នុងរយៈពេល៦ខែដំបូង វាបានធ្លាក់ចុះប្រហែល ៥ពាន់លានដុល្លារ។

យោងតាមរបាយការណ៍របស់ Bloomberg ឲ្យដឹងថា បើសិនជាការធ្លាក់ចុះនៃចំនួនវិនិយោគនេះ នៅតែបន្តសម្រាប់ឆ្នាំដែលនៅសល់ វានឹងគូសបញ្ជាក់ពីលំហូរលុយសុទ្ធចេញប្រចាំឆ្នាំលើកដំបូង យ៉ាងហោចណាស់ចាប់តាំងពី ឆ្នាំ១៩៩០មក នៅពេលដែលទិន្នន័យប្រៀបធៀប បានចាប់ផ្តើម។

ប៉ុន្មានឆ្នាំថ្មីៗនេះ គេបានមើលឃើញការវិនិយោគបរទេសចូលក្នុងប្រទេសចិន បានធ្លាក់ចុះបន្ទាប់ពីបានឡើងដល់ជាប់កំណត់ត្រា ៣៤៤ពាន់លានដុល្លារ ក្នុងឆ្នាំ ២០២១ ។

តួលេខដែលបានចេញផ្សាយមុននេះដោយក្រសួងពាណិជ្ជកម្មរបស់ប្រទេសចិន បានបង្ហាញថា ការវិនិយោគផ្ទាល់ពីបរទេសថ្មី (FDI) ចូលមកក្នុងប្រទេសក្នុងឆមាសទីមួយ នៃឆ្នាំ ២០២៤ គឺទាបបំផុត ចាប់តាំងពីការចាប់ផ្តើមនៃជំងឺរាតត្បាតក្នុងឆ្នាំ ២០២០។

ការវិនិយោគបរទេស​នៅប្រទេស​ចិន បានធ្លាក់ចុះ​ជិត ១៥ពាន់លានដុល្លារ ក្នុងអំឡុងខែមេសាដល់ខែមិថុនា ឆ្នាំនេះ

• ហេតុអ្វី បានជាចិនទាក់ទាញអ្នកវិនិយោគបរទេសលែងបាន?

ក្រៅ​ពី​ការ​ធ្លាក់​ចុះ​នៃ​សេដ្ឋកិច្ច, ភាព​តានតឹងខាង​ភូមិសាស្ត្រ​នយោបាយ​ដែលកំពុងកើន​ឡើង ​បាន​និង​កំពុង​បង្វែរ​ចំណាប់អារម្មណ៍របស់អ្នក​វិនិយោគ​បរទេស ​ចេញ​ពី​ប្រទេស​ចិន។

លើសពីនេះ ការផ្លាស់ប្តូរភ្លាមៗទៅកាន់រថយន្តអគ្គិសនី ឬ EVs នៅក្នុងប្រទេសចិន ក៏បានកាត់បន្ថយផលប្រយោជន៍របស់ក្រុមហ៊ុនរថយន្តបរទេសផងដែរ ដោយមានការដកថយ ឬកាត់បន្ថយការវិនិយោគរបស់ពួកគេផងដែរ។

• អ្នកវិនិយោគកាន់តែចាប់អារម្មណ៍ ទៅក្នុងប្រទេសផ្សេងទៀត

មិនតែប៉ុណ្ណោះ ប្រទេសដែលមានសេដ្ឋកិច្ចជឿនលឿនជាច្រើន កំពុងផ្តល់អត្រាការប្រាក់ខ្ពស់មិនដូចជានៅទីក្រុងប៉េកាំង ដែលបាននឹងកំពុងបន្ទាបការប្រាក់ ដើម្បីកែលម្អសេដ្ឋកិច្ចរបស់ពួកគេ។ បញ្ហានេះបានផ្តល់ហេតុផលគ្រប់គ្រាន់មិនឲ្យបរទេសចម្រុះជាតិសាសន៍វិនិយោគនៅក្នុងប្រទេសចិន ហើយដាក់សាច់ប្រាក់របស់ពួកគេទៅកន្លែងដែលកំពុងត្រូវបានផ្តល់ផលចំណេញកាន់តែប្រសើរវិញ។

ប្រទេសចិន ដែលមានអួតថាជាមហាអំណាចសេដ្ឋកិច្ចទីពីររបស់ពិភពលោក បាននិងកំពុងខិតខំប្រឹងប្រែងគ្រប់បែបយ៉ាង ដើម្បីទាក់ទាញ ក៏ដូចជាព្យាយាមរក្សាការវិនិយោគពីបរទេស។

រដ្ឋាភិបាលដែលដឹកនាំដោយលោក ស៊ី ជីពីង (Xi Jinping) បាននិងកំពុងពណ៌នាខ្លួនឯងថា បើកចំហ និងទាក់ទាញសម្រាប់អាជីវកម្មបរទេស ក្នុងក្តីរំពឹងថាក្រុមហ៊ុនជាច្រើនមកពីក្រៅប្រទេស នឹងនាំមកនូវបច្ចេកវិទ្យាទំនើបៗ និងទប់ទល់នឹងសម្ពាធពីសហរដ្ឋអាមេរិក និងប្រជាជាតិដទៃទៀតដែលផ្តាច់ចេញពីប្រទេសចិន។

• ការកើនឡើង នៃការវិនិយោគចេញក្រៅប្រទេស

ជាមួយគ្នានេះ ការវិនិយោគចេញក្រៅប្រទេសរបស់ចិន បានឡើងដល់កម្រិតខ្ពស់ថ្មីមួយ នៅក្នុងត្រីមាសទីពីរនេះ ដោយក្រុមហ៊ុនទាំងនោះ កំពុងបណ្តាក់ទុនចំនួន ៧១ពាន់លានដុល្លារនៅឯបរទេស គឺកើនឡើងជាង ៨០%ពីចំនួន $៣៩ពាន់លាន ដែលបានកត់ត្រាក្នុងអំឡុងពេលដូចគ្នាកាលពីឆ្នាំមុន។

ការកើនឡើងនៃការវិនិយោគចេញក្រៅនេះ ភាគច្រើនសំដៅទៅលើគម្រោងដូចជារថយន្តអគ្គិសនី និងរោងចក្រផលិតអាគុយជាដើម។

ទិន្នន័យដែលបានចេញផ្សាយដោយរដ្ឋបាល នៃការប្តូររូបិយប័ណ្ណបរទេសរដ្ឋ ក៏បានបង្ហាញពីភាពខុសគ្នាកំពុងកើនឡើង នៅក្នុងការវាស់វែងនៃអតិរេកពាណិជ្ជកម្មរបស់ប្រទេសចិន ដែលបានឡើងដល់កំណត់ត្រា ៨៧ពាន់លានដុល្លារក្នុងត្រីមាសទីពីរ និងជិត ១៥០ពាន់លានដុល្លារសម្រាប់ឆមាសទីមួយនៃឆ្នាំនេះ។

ភាពខុសគ្នានេះ ត្រូវបានគូសបញ្ជាក់ដោយរតនាគារសហរដ្ឋអាមេរិកកាលពីដើមឆ្នាំនេះ ដែលបានជំរុញឱ្យប្រទេសចិន ពន្យល់ពីភាពខុសគ្នាសំខាន់ៗនៅក្នុងតួលេខពាណិជ្ជកម្មជាច្រើន។

ទោះជាយ៉ាងណាក៏ដោយ យោងតាមរបាយការណ៍ថ្មីៗនេះដោយមូលនិធិរូបិយវត្ថុអន្តរជាតិ (IMF) ឲ្យដឹងថា ភាពខុសគ្នានេះ គឺដោយសារតែ “វិធីសាស្រ្តផ្សេងគ្នាដែលត្រូវបានប្រើដើម្បីកត់ត្រាការនាំចេញ និងការនាំចូលទំនិញ”៕

ក្រុងប៉េកាំង បាននិយាយកាលពីថ្ងៃសុក្រថា ខ្លួនបានដាក់ពាក្យបណ្តឹងឧទ្ធរណ៍ទៅអង្គការពាណិជ្ជកម្មពិភពលោក ជុំវិញការយកពន្ធបន្ថែមរបស់សហភាពអឺរ៉ុបលើការនាំចូលរថយន្តអគ្គិសនីពីប្រទេសចិន។

កាលពីខែកក្កដា សហភាពអឺរ៉ុប បានតម្រូវឲ្យបំពេញកាតព្វកិច្ចបណ្តោះអាសន្នបន្ថែមរហូតដល់ ៣៨% លើរថយន្តអគ្គិសនីរបស់ចិន បន្ទាប់ពីស្ថាប័នប្រតិបត្តិរបស់ខ្លួន បានបញ្ចប់ការស៊ើបអង្កេតមួយដែលថា ចិនកំពុងធ្វើឱ្យខូចដល់គូប្រជែងអឺរ៉ុបដោយអយុត្តិធម៌។

នៅក្នុងសេចក្តីថ្លែងការណ៍មួយ, អ្នកនាំពាក្យក្រសួងពាណិជ្ជកម្មចិន បាននិយាយ ថា៖ “កាលពីថ្ងៃទី៩ ខែសីហា ប្រទេសចិនបានអំពាវនាវឲ្យមានយន្តការដោះស្រាយវិវាទរបស់អង្គការពាណិជ្ជកម្មពិភពលោក ជុំវិញវិធានការប្រឆាំងនឹងការឧបត្ថម្ភធនបណ្តោះអាសន្នរបស់សហភាពអឺរ៉ុបលើរថយន្តអគ្គិសនី” ។

ក្រសួងនេះ បាននិយាយថា ការអំពាវនាវនោះ មានគោលបំណង “ការពារសិទ្ធិអភិវឌ្ឍន៍ និងផលប្រយោជន៍ នៃឧស្សាហកម្មរថយន្តអគ្គិសនី និងកិច្ចសហប្រតិបត្តិការលើការផ្លាស់ប្តូរទៅជាបៃតងជាសកល” ។

រថយន្តអគ្គិសនីចិន ត្រូវបានសហភាពអឺរ៉៉ុនតម្រូវឲ្យបង់ពន្ធបន្ថែម ៣៨%

ក្រសួងនេះ បាននិយាយថា៖ “សេចក្តីសម្រេចបឋមរបស់ EU ខ្វះមូលដ្ឋានច្បាប់ជាក់ស្តែង និងបំពានយ៉ាងធ្ងន់ធ្ងរលើច្បាប់របស់ WTO និងធ្វើឱ្យអន្តរាយដល់ស្ថានភាពទូទៅនៃកិច្ចសហប្រតិបត្តិការពិភពលោក ក្នុងការដោះស្រាយការប្រែប្រួលអាកាសធាតុ ។ យើងជំរុញឱ្យ EU កែតម្រូវជាបន្ទាន់នូវការអនុវត្តខុសរបស់ខ្លួន និងរួមគ្នារក្សាស្ថិរភាពនៃកិច្ចសហប្រតិបត្តិការសេដ្ឋកិច្ច និងពាណិជ្ជកម្មចិន-សហភាពអឺរ៉ុប ក៏ដូចជាខ្សែសង្វាក់ផ្គត់ផ្គង់ និងឧស្សាហកម្មរថយន្តអគ្គិសនី”។

ប្រទេសចិន និងសហភាពអឺរ៉ុប បានប៉ះទង្គិចគ្នាក្នុងប៉ុន្មានឆ្នាំថ្មីៗនេះ លើបញ្ហាជាច្រើនទាក់ទងនឹងពាណិជ្ជកម្ម បច្ចេកវិទ្យា សិទ្ធិមនុស្ស និងសន្តិសុខជាតិ។

សហភាពអឺរ៉ុប បានចាប់ផ្តើមការស៊ើបអង្កេតជាច្រើន ដោយផ្តោតលើការឧបត្ថម្ភធនរបស់ចិនសម្រាប់បន្ទះ ពន្លឺព្រះអាទិត្យ ទួរប៊ីនខ្យល់ និងរថភ្លើង ខណៈដែលទីក្រុងប៉េកាំង បានចាប់ផ្តើមការស៊ើបអង្កេតរបស់ខ្លួន លើការនាំចូលម៉ាកយីហោអឺរ៉ុប និងសាច់ជ្រូក។

សហរដ្ឋ​អាមេរិក ​បាន​ដំឡើង​ពន្ធ​គយ​លើ​រថយន្ត​អគ្គិសនី​របស់​ចិន​រហូតដល់​ ១០០%​រួច​ហើយ ខណៈ​កាណាដា​ កំពុង​ពិចារណា​លើទង្វើ​ស្រដៀង​គ្នា​នេះ៕

ក្រុមហ៊ុនបច្ចេកវិទ្យាចិន (សៀវម៉ី) Xiaomi បានទិញដីមួយកន្លែងក្នុងទីក្រុងប៉េកាំងក្នុងតម្លៃ 842 លានយួន (ប្រមាណ $116 លានអាមេរិក) ដើម្បីពង្រីកការផលិតរថយន្តអគ្គិសនី បន្ទាប់ពីជោគជ័យក្នុងការចាប់ផ្តើម នៃរថយន្តស៊េរីទំនើបរបស់ខ្លួន។

យោងតាមឯកសារដែលបានចេញផ្សាយដោយគណៈកម្មការផែនការ និងធនធានធម្មជាតិក្រុងប៉េកាំង ឲ្យដឹងថា ដីទំហំ 53 ហិកតានោះ មានទីតាំងនៅជិតរោងចក្ររថយន្តអគ្គិសនី (EV) ដែលមានស្រាប់របស់ក្រុមហ៊ុន Xiaomi នៅក្នុងសង្កាត់ Yizhuang នៃរដ្ឋធានីនេះ។ ឯកសារនេះ បាននិយាយថា ដីនេះ ត្រូវបានទិញដោយក្រុមហ៊ុនបុត្រសម្ព័ន្ធរបស់ Xiaomi គឺក្រុមហ៊ុន Xiaomi Jingxi Technology ហើយនឹងត្រូវបានប្រើសម្រាប់ “ការអភិវឌ្ឍន៍ឧស្សាហកម្មរថយន្តទំនើប និងរថយន្តឆ្លាតវៃថាមពលថ្មី”។

ក្រុមហ៊ុន Xiaomi បានជោគជ័យក្នុងទីផ្សាររថយន្តដំបូង ជាមួយម៉ូដែល SU7 នេះ

ក្រុមហ៊ុន Xiaomi បានចូលទីផ្សាររថយន្តក្នុងខែមីនា ដោយរថយន្តគំរូដំបូង SU7  មានតម្លៃ 215,900 យួន  ជាជំហានដំបូង នៅក្នុងផែនការ 10 ពាន់លានដុល្លាររបស់នាយកប្រតិបត្តិ ឡី ជុន (Lei Jun) ដើម្បីក្លាយជាកម្លាំងដ៏សំខាន់ នៅក្នុងទីផ្សាររថយន្តអគ្គិសនី ។ លោក ឡី បាននិយាយកាលពីដើមខែនេះថា ក្រុមហ៊ុននេះ បានចែកចាយរថយន្តនេះចំនួន 30,000 គ្រឿងរួចហើយ ហើយកំពុងស្ថិតនៅលើផ្លូវឆ្ពោះទៅកាន់គោលដៅលក់ ក្នុងឆ្នាំ 2024 ដំបូងរបស់ខ្លួន រថយន្តចំនួន 100,000 គ្រឿងក្នុងខែវិច្ឆិកាឆាប់ៗនេះ។

ភាពភាវាយលុកភ្លាមៗរបស់ក្រុមហ៊ុន Xiaomi ទៅក្នុងរថយន្តអគ្គិសនី គឺផ្ទុយពីដៃគូប្រជែងជាច្រើន ដែលកំពុងជួបបញ្ហាដណ្តើមចំណែកទីផ្សារនៅក្នុងឧស្សាហកម្មដ៏ចង្អៀតមួយ។ ទីក្រុងប៉េកាំង បានផ្អាកការឧបត្ថម្ភធនជាតិ សម្រាប់ការទិញរថយន្តអគ្គិសនី ក្នុងឆ្នាំ 2022 ហើយ តម្រូវការដែលកំពុងធ្លាក់ចុះ បានធ្វើឲ្យក្រុមហ៊ុនផលិតរថយន្តអគ្គិសនីជាច្រើន ក្នុងនោះមានទាំងក្រុមហ៊ុន WM Motor Technology Group និងម៉ាក HiPhi ដ៏ល្បី ពីក្រុមហ៊ុន Human Horizons Shanghai Internet Technology បានក្ស័យធន ឬផ្អាកការផលិត។

ក្រុមហ៊ុនដែលល្បីខាងផលិតស្មាតហ្វូនមួយនេះ ក៏មានគោលបំណងចាប់ផ្តើមផលិត និងលក់រថយន្តស្ព័រដែលស្រដៀងទៅនឹងម៉ូដែល Y របស់ក្រុមហ៊ុន Tesla ដែរ នៅដើមឆ្នាំ 2025។ ពីមុន ក្រុមហ៊ុន​នេះ ធ្លាប់បាននិយាយថា ខ្លួនគ្រោងនឹងចាប់ផ្តើមការងារលើដំណាក់កាលទី២ នៃរោងចក្រផលិតរថយន្តរបស់ខ្លួនដោយការសាងសង់ គ្រោងនឹងបញ្ចប់ក្នុងឆ្នាំ 2025។ ដំណាក់កាលទី១ មានសមត្ថភាពផលិតរថយន្ត ប្រចាំឆ្នាំ ចំនួន150,000 គ្រឿង៕